أخبار اليوم – مضى شهر كامل على غياب الشاب عواد علان الرشايدة، الذي خرج من منزله في منطقة الروضة بالشونة الجنوبية صباح الخميس 27 آب الماضي، بعد أن أخبر زوجته ووالدته بأنه ذاهب في مشوار قصير وسيعود قريباً، فيما تواصل عائلته البحث عنه وتناشد كل من شاهده أو يملك أي معلومة عنه إبلاغ الجهات المختصة على الرقم 911.

وجاء في منشور متداول على موقع فيسبوك:

يوم الخميس، وتحديدا بتاريخ 27/8، الشهر الماضي،
في شاب اسمه عواد علان الرشايدة، صحي الصبح وحكى لزوجته ووالدته:
"بدي أطلع مشوار صغير وهيني راجع قريب!"

وطلع عواد من البيت،
بدون ما تكون معه هويته، ولا أي إثبات شخصية.

لكن هالمشوار الصغير، تأخر،
وتأخر كثير، لحد ما صار الليل، ولسه مش مروح!

خلص اليوم، ومرت بعده أيام،
وعواد لسه مش مبين.

تم تبليغ الجهات المختصة عن غيابه،
وبلش البحث عن الشاب اللي طلع من بيته على مشوار،
وما رجع منه لليوم.

نشامى الأمن العام وفرق التتبع ما قصروا أبدا.

راحوا على بيته في الشونة الجنوبية، بمنطقة الروضة،
وأخذوا أواعي له كان لابسها سابقا،
لحتى تستخدمها فرق التتبع وتخلي كلاب الأثر تتبعه.

وتم تمشيط المنطقة بالكامل،
بس للأسف، لليوم ما في أي أثر يدلهم عليه!

واللي محير أهله أكثر، إنه عواد ما بعاني من أي مشاكل،
صحته تمام، وتفكيره سليم الحمدلله.

وحتى قبل غيابه بقولوا:
"عواد ما كان في بينه وبين أي حد تواصل مش معتاد،|
فطلوعه من البيت وعدم رجعته غريبة!"

ما عندهم جواب يفسر هالغياب، ولا معلومة تطمنهم عليه.

وبعد ما دوروا عليه بكل مكان، أهله بحكوا بوجع:
"إحنا بالشونة الجنوبية فقدنا الأمل، دورنا عليه بكل مكان!"

تخيلوا حال أمه وزوجته، آخر إشي حكاه إلهم قبل ما يطلع:
"هيني راجع!"

واليوم، صار شهر كامل غايب عن بيته،
وهم لسه عم بستنوا برجعته.

شهر، والعيلة عايشة بتوتر وقلق كبير،
بدهم يعرفوا وين عواد، وشو صار معه، وليش ما رجع!

ومع كل هالخوف، لسه أهله بقولوا:
"عواد مستحيل يختفي هيك، يا رب وعسى إنه يبين!"

وابن عمه، وقلبه خايف عليه، بناشد وبقول:
"أي واحد بعرف عنه أي شيء،
يبلغ أي حد منا إحنا الرشايدة في الشونة الجنوبية، وإحنا نيجيه!"

واليوم، العيلة بتناشد كل واحد فينا يساعدهم يوصلوا لعواد.

إذا شفته، أو لمحته، أو عندك أي معلومة عنه،
بلغ الجهات المختصة فورا على 911.

لأنه هذا هدف أهله من نشر المناشدة،
توصل لحد شافه، أو لمح وجهه، أو بعرف عنه إشي،
ويمكن تكون عنده المعلومة اللي تدلهم عليه بعد كل هالغياب.

خلينا نساعدهم بالنشر،
يمكن المناشدة توصل للشخص اللي عنده خبر عن عواد،
وتكون سبب بإنه يرجع لبيته، وتطمن قلوب أهله عليه.

يا رب ترد عواد سالم غانم لأهله،
وترجعه لبيته ولأمه وزوجته،
وتبدل هالخوف والانتظار بفرحة رجعته بينهم.

"صورة عواد علان الرشايدة"