أبو كركي يكتب: نحو التعريف بالتعريفة

mainThumb

01-04-2023 11:20 AM

printIcon

أ.د نجيب ابو كركي
عليم الله انه كان الها قيمة نص نيرة. قبل نص قرن ( ونص نيف) كانت التعريفة تجيب ٥٠ غرام قضامه او حبة اسكيمو ومرات حبتين ان كنت حدق واشتريت الاسكيمو بعطاء باسلوب فنتين اربح حبتين كانت التعريفة تجيب وقية سكر بتكفي لابريق شاي من الحجم اللي بحمم العزبة او ٢٠ غم بزر بطيخ او "فسدق" او اجرة الباص المرسيدس الازرق للعيل من العيزرية او ابو ديس للقدس حتى كانت تجيب "حامض حلو" و احيانا ٢٠ قل من السوق السودا عند الدكان كانت بالسعر الرسمي تجيب ٦قلول من اللي بسموهن "دواحل" بعروس الشمال أو ٦ حبات فلافل! من مطعم السوداني الضخم اللي ماكنت تقدر ابدا تميز انه صاحي والا نايم لانه كان دايما مسكر عيونه يمكن من دخان زيت القلي او "سكارة" الهيشي من جنوب السودان اللي ملزقة بثمه و " في مجال الامن والسلم الدوليين" كانت التعريفة تشكل خطرا وتصل انها تكون سبب لهوشة بين أخوين من اب وام مو من ضراير لما يكون مصروف الاثنين قرش ونص (هاي قصة بحيلكوا اياها بعدين هسة مش وقته) ومن جهة اخرى حتى تجيب التعريفة كان لازم تسرح اكمن ساعة بحارات الزرقا وزواريبها حتى تللم كيلو حديد خردة وتبيعه لمحل أبو عطا بالزرقا بتعريفه! منظر لا انساه اخيرا بنت عمرها بحدود ١٠ سنوات (بدون نيف) تبكي على عتبة بيتهم وكشتها منفوشة ودموعها وشغلات ثانية ترشح من عينيها وانفها على وجنتيها وشفتيها (براطمها بعروس الشمال) اول يوم العيد واحنا رايحين عالمقبرة بجناعة وتنوح بصوت عالي بيقطع القلب .. انا بدي تعريف-------ية .. نرجع لقصة الطوشة اللي قلتلكو بعدين بحكيلكو اياها: كنا بالشاحنة نص كمر من شاحنات الجيش العربي هذيك الايام (انجليزية) صباحا تنقل ولاد المعسكر بخو لمدارسهم بالزرقا ووقعت طوشة بين راكان وطارق ولاد جارنا الضابط بدور العائلات للكتيبة الثامنة في خو لانه معهم قرش ونص مصروف احتاروا كيف يتقاسموهن وولعت بينهم وكلنا طلاب أول وثاني ابتدائي مما اتاح لي فرصة لعب دور قوات حفظ السلام الدولية واصلاح ذات البين في اطار خطة لاحلال السلام العادل والدائم لبكرة بينهما من خلال التبرع بتعريفة من مصروفي هذاك اليوم وتجنب امتداد الخلافات و "مجحرة" تستمر بقية اليوم واظن كانت هذيك الحادثة ببداية الستينيات اول مساهمة اردنية بقوات حفظ السلام على المستوى الدولي ومن هذاك الوقت ما حدا انتبه لهالموضوع او حتى دعاني للقصر الملكي للتكريم ولا ما يحزنون (بمزح معكو وانا بفهم انهم ما بقدروا يدعو كل الشعب ولا حتى كل المؤثرين واليوتيوبرز انا اعتبرت اني تكرمت وانه كل واحد فينا تكرم لما دعوهم همه لانه في كل يوتيوبر .. يوجد "يو" يعني انت بالانجليزي فهمتوها؟ اعتبر انك اندعيت! بس بصراحة تعريفة هالايام أحلا لانه تعريفة زمان كان عليها خرابيش وما كان عليها صورة ملكنا الله يحفظه.
(الصورة تعبيرية وتمثل نص كمر - والموضوع. فرفشة هايبرد).
*استاذ الجيوفيزياء وعلم الزلازل -الجامعة الاردنية.