أخبار اليوم - رصد - قال أحد المواطنين من أبناء لواء دير علا، في ردّ صريح على بعض الأصوات المنتقدة لخدمات مستشفى معدي:
"الناس اللي بتحكي بدنا كوادر وبدنا مش عارف شو ومش عاجبهم العجب.. إحنا بنعمة وخير، وكل يوم منشوف تحسّن ملموس، والله يعطيهم العافية، الأمور ماشية للأفضل إن شاء الله".

وأضاف المواطن في حديثه، مستعرضًا أبرز التحسينات:
"أول إشي، تم توفير 3 سيارات جولف كهربائية لنقل المرضى والمراجعين داخل المستشفى، ومعها مظلات فوق الكراسي مثل الصورة اللي انتشرت، واللي متعود عالتكييف بنقوله من البداية: ما فيها مكيف.. يعني ما تزعلوش ".

وتابع: "كمان في مظلة جديدة رح تتركب عند مدخل العيادات حتى الناس توقف براحتها، لا شمس ولا مطر، وكل هالإشي مشكورين عليه".

أما عن الكوادر الطبية، فقال: "فيه زيادة بكادر المستشفى تقارب 40 موظف، ما بين تمريض، وأشعة، وتخدير، ومحاسبة، وصيدلة.. وهذا كله بيفرق معنا إحنا المواطنين، لأن الخدمة صارت أسرع وأفضل".

وأشار إلى الخدمات الطبية الجديدة قائلًا:
"صار عنا طبيبين كلى جاهزين وقت الطلب، والقسم نفسه مجهز بأحدث الأجهزة على مستوى المملكة والعالم، ومعايير ضبط العدوى فيه عالية جدًا".

وبيّن أيضًا: "أضف إلى هيك، تم افتتاح وحدة فحص سرطان الثدي، وعيادة متخصصة لأمراض القلب والشرايين مع تصوير الإيكو، وكمان وحدة حديثة لفحص السمع".

وختم المواطن حديثه بتوجيه الشكر:
"كل الشكر لدولة رئيس الوزراء على دعمه المباشر، والشكر الأكبر لمدير مستشفى معدي الدكتور عبدالعزيز العواملة، اللي فعليًا شغال بصمت وهمة لخدمة أبناء اللواء".

وختم بالقول: "إحنا بنحكي الحق، والمستشفى اليوم غير، والتغيير للأفضل.. اللي ما بدو يشوف الخير هاي مشكلته، بس الحق يُقال"